Page:Madeleine de Scudéry - Clélie, histoire romaine - Volume 02.pdf/562

cela ils furent voir la Maiſon de ce Iardin, s’il eſt permis de parler ainſi, afin de s’y repoſer, & de ioüir de la belle veuë d’vn Cabinet où toute cette belle Troupe s’aſſit. Mais comme Paſithée y entra la derniere, parce qu’elle s’eſtoit arreſtée à parler auec Artaxandre, elle trouua que toutes les Places eſtoient priſes : à la reſerue de deux qui eſtoient expoſées au grand iour qui venoit d’vn grand Balcon qui ſe iette hors d’œuure. A ce que ie voy, dit Paſithée en riant, on ſçait bien que ie n’ay pas la fantaiſie de ces Dames qui ne veulent iamais eſtre veuës qu’à l’ombre, puis qu’on me met le Soleil aux yeux. Quand on a le tein auſſi beau que vous l’auez, reprit Artaxandre, qu’on a les yeux brillans & enioüez, & que l’on eſt fort ieune, & admirablement belle, on ne peut eſtre mieux qu’où vous eſtes. Principalement, adiouſta