Page:Madeleine de Scudéry - Clélie, histoire romaine - Volume 02.pdf/561

vne partie des plus beaux Fruits qu’on luy offrit : & ayant laiſſé fortuitement tomber vne fort iolie Bague qu’il ramaſſa, & qui n’eſtoit pas d’vn prix conſiderable, elle ſouffrit qu’il la gardaſt. Elle la luy redemanda pourtant d’abord : mais comme il luy dit qu’il aimoit autant à garder ce qu’il trouuoit, qu’elle diſoit aimer ce qu’elle déroboit, elle luy reſpondit qu’elle ne vouloit point qu’il l’euſt, s’il ne la gagnoit à quelque choſe. Pourueû que vous le veüilliez Madame, lui dit-il, cela ne ſera pas mal-aiſé : car vous n’auez qu’à gager cette Bague contre moy, que vous n’eſtes pas vne des plus belles Perſonnes du monde, & qu’à choiſir des iuges pour faire que ie la gagne, & que ie ne la doiue ny à vous, ny au hazard. Et en effet ils firent cette gageure tout à fait plaiſamment, & la Bague demeura à Artaxandre. Apres