Page:Madeleine de Scudéry - Clélie, histoire romaine - Volume 02.pdf/557

de ne me conſiderer que comme voſtre Amie. Quoy qu’il en ſoit Madame, luy dit-il, laiſſons l’aduenir à la conduite de l’Amour & de la Fortune : & ſouffrez ſeulement que ie vous aſſure, que quoy que ie n’aye iamais eu l’honneur de vous voir que depuis vn quart d’heure, il y a plus de quinze iours que ie vous attens auec impatience. Vous m’auez meſme l’obligation, adiouſta-t’il en riant, de n’auoir point voulu donner mon cœur à pas vne des Belles qui ſont icy, iuſques à ce que i’euſſe eu l’honneur de vous voir : de peur d’eſtre contraint de l’oſter à celle à qui ie l’aurois donné, quand vous y ſeriez arriuée. Il eſt vray, dit alors l’aimable Cephiſe, qu’Artaxandre tout galant qu’il eſt, n’a encore fait nulle galanterie particuliere auec pas vne de nos Belles : ie luy en ſuis tout à fait obligée, repliqua Paſithée : & pour luy ren-