Page:Madeleine de Scudéry - Clélie, histoire romaine - Volume 02.pdf/554

le viſage, & l’enioüement en toute ſa Perſonne, ſembloit contrefaire quelqu’vn en parlant à vne de ces Dames qui ſe nomme Cephiſe. Et en effet Artaxandre & Philionte s’eſtant arreſtez derriere vne Paliſſade à regarder cette belle Troupe, virent qu’effectiuement Paſithée contrefaiſoit vn Amant à la vieille mode, qui eſtoit alors à Crete : & qui auoit vn certain air contraint & ridicule, qui le rendoit inſuportable, quoy qu’il euſt de l’eſprit. Cependant Paſithée le contrefaiſoit ſi admirablement, que quoy qu’Artaxandre & Philionte n’entendiſſent pas le nom de celuy dont elle imitoit ſi bien & le ſon de la voix, & le marcher, & l’action, ils connurent ſans en pouuoir douter, qui eſtoit celuy qu’elle repreſentoit ſi parfaitement. De ſorte qu’Artaxandre qui ſçauoit faire auſſi quand il le vouloit vne pareille choſe admira-