Page:Madeleine de Scudéry - Clélie, histoire romaine - Volume 02.pdf/545

Celere a dit des choſes qui m’ont attendry le cœur : & ce qu’il y a d’eſtrange, dit Aronce, c’eſt que Celere qui parle ſi eloquemment d’amour, n’a pourtant iamais eu de ces grandes & violentes paſſions qui inſtruiſent ſi bien ceux qui les ont, de tous les ſentimens qu’elles inſpirent. Il eſt vray, repliqua Celere : mais quoy qu’on puiſſe dire que ie n’ay eu que des commencemens d’amour, ie ne laiſſe pas de connoiſtre bien cette paſſion : parce que ſi ie ne m’opoſois pas à mon temperamment, ou que i’euſſe trouué quelque aimable melancolique qui m’euſt voulu aimer, i’aurois eſté le plus amoureux de tous les hommes. Pour moy, repliqua Amilcar, ie n’ay point de peine à vous croire : car ie ſçay bien que dans le commencement de ma vie, i’ay eu cent commencemens d’amour, qui m’auoient rendu auſſi ſçauant de cette