Page:Madeleine de Scudéry - Clélie, histoire romaine - Volume 02.pdf/542

ſouſtiens que pour connoiſtre tous les plaiſirs de l’amour, il en faut connoiſtre toutes les peines : & que quiconque ne peut ſe faire vn grand malheur d’vne fort petite choſe, ne trouuera pas meſme vn grand plaiſir à vne grande faueur. Cependant pour eſtre heureux en amour, il faut ſe faire de grands plaiſirs de tres petites faueurs & il faut auoir le cœur ſi ſenbible, que la ſeule veuë du lieu où demeure la Perſonne que l’on aime donne de la ioye, & de la ioye qui trouble le cœur. Il faut que ſon nom prononcé inopinément vous faſſe rougir : il faut la ſouhaiter par tout où l’on ſe trouue, ou ſe deſirer en tous les lieux où elle eſt. Il faut en auoir le cœur tout remply : il faut ne penſer à autre choſe : & il faut y penſer tantoſt auec plaiſir, & tantoſt auec douleur. Cependant il n’apartient pas ny à vne belle enioüée, ny à vne capri-