ce pretendu Galant eſtoit vn infidelle. Mais Madame, adiouſta-t’elle, pour vous aprendre par quelle auanture i’ay commencé à vouloir ouurir des Lettres ; vous ſçaurez que la premiere Perſonne que i’ay aimée, eſt la plus artificieuſe Fille qui fut iamais : & qu’apres luy auoir rendu mille marques d’amitié, ie fis vn petit voyage à la Campagne qui dura huit iours : où nous fuſmes preſques touſiours ſeules auec vne Tante qu’elle a qui eſt ma Parente. De ſorte que dans cette ſolitude nous eſtions continuellement enſemble : mais comme il n’eſt rien de ſi doux en l’amitié que de ſe dire tout ce que l’on penſe des Gens qu’on connoiſt, vous ſçaurez que nous parlaſmes de tout ce que nous connoiſſions de Gens au monde : & que nous ne parlaſmes de perſonne dont elle ne me demandaſt ce que i’en penſois.
Page:Madeleine de Scudéry - Clélie, histoire romaine - Volume 02.pdf/54
Le texte de cette page a été corrigé et est conforme au fac-similé.
