Page:Madeleine de Scudéry - Clélie, histoire romaine - Volume 02.pdf/535

uent meſme de vous le montrer que dans vne longue ſuite de temps : & quand vous le connoiſſez tout entier, vous ne connoiſſez pas encore leur cœur. De ſorte que deſcouurant tous les iours de nouuelles graces, vous auez tous les iours de nouueaux plaiſirs : mais il n’en eſt pas de meſme d’vne Perſonne enioüée : car elle vous montre preſques dés la premiere fois que vous la voyez toute ſa beauté, tout ſon eſprit, tout ſon cœur, & toute ſon affection : eſtant certain que ſi elle ne vous aime d’abord, elle ne vous aime preſque iamais. Ioint que quand elle vous aimera, elle ne vous aimera guere, & ne vous donnera que de mediocres plaiſirs. En effet il n’apartient qu’à celles qui ont l’ame paſſionnée, de ſçauoir faire des faueurs de toutes choſes : d’inuenter des plaiſirs innocens ; & de faire durer l’eſperance