Page:Madeleine de Scudéry - Clélie, histoire romaine - Volume 02.pdf/530

Perſonne guaye, brillante, & d’humeur eſgalle : & ie ſouſtiens meſme que quand on eſt heureux & adroit, la Conqueſte n’en eſt pas plus longue à faire, que celle de ces Perſonnes qui donnent de ſi grandes eſperances dés le premier moment qu’on commence de les aimer. Si Celere, repliqua Amilcar, ſouſtient auſſi bien le Party des belles melancoliques, que vous auez ſouſtenu celuy des fieres, i’auray beſoin de tout l’agréement de la belle Plotine, pour gagner la Cauſe que ie deffens. Comme les Grecs ſont plus eloquens que les autres, repliqua Celere, & qu’Artemidore a infiniment de l’eſprit, il pourra eſtre que ie ne diray pas ſi bien mes raiſons qu’il a dit les ſiennes. Ce n’eſt pas que ſon Party & le mien ſoient oppoſez : car il eſt peu de capricieuſes & de fieres, qui ayent vn fort grand enioüement : & il en eſt peu auſſi qui