Page:Madeleine de Scudéry - Clélie, histoire romaine - Volume 02.pdf/527

amour, il ne ſoit preſques aſſuré de vaincre, s’il ſçait bien meſnager les occaſions, & ſe ſeruir à propos de certains momens fauorables, que l’on trouue quelqueſfois en la conuerſation de toutes les fieres, & de toutes les capricieuſes. En effet il y a des heures, où l’on diroit qu’il y a vn interregne dans leur cœur : & qu’il n’y a qu’à s’en vouloir emparer pour s’en rendre Maiſtre. Ie ſouſtiens meſme que les faueurs les plus ſenſibles, s’obtiennent plus ſouuent par caprice, & par emportement, que par tendreſſe, & par reconnoiſſance : & qu’vne fiere capricieuſe fait quelqueſfois plus de chemin en vne heure, qu’vne enioüée n’en fait en vn an. I’en tombe d’accord, interrompit Amilcar : mais pour l’ordinaire ces Capricieuſes ſe repentent vn quart d’heure apres, des faueurs qu’elles vous ont faites : elles ſe haïſſent elles meſmes de ce qu’elles vous aiment