Page:Madeleine de Scudéry - Clélie, histoire romaine - Volume 02.pdf/523

C’eſt pourquoy ie trouue beaucoup plus d’auantage à ſe faire aimer d’vne Perſonne enioüée : car premierement la Conqueſte en eſt plus facile : on la poſſede en paix : ſi elle a quelque leger ſentiment de ialouſie, on l’apaiſe auec vne ſerenade : on n’a iamais que de petites querelles : & tous les racommodemens ſe paſſent en Feſtes & en diuertiſſemens. Ie ſçay bien que ces Belles enioüées n’aiment peut-eſtre pas ſi ardemment : mais elles ne veulent pas auſſi qu’on les aime ſi terriblement : de ſorte que donnant autant de liberté qu’elles en prennent, il n’y a rien d’iniuſte ny rien d’incommode. Elles ne veulent de vous que des choſes qui ſont plaiſantes d’elles meſmes : car elles aiment à ſe promener, à ſe diuertir, à railler, à chanter, & à dancer : iugez donc ſi tout cela eſt difficile à faire pour l’amour d’elles ? & s’il ne vaut pas bien mieux les ſeruir, que ces au-