Page:Madeleine de Scudéry - Clélie, histoire romaine - Volume 02.pdf/517

vous, repliqua Clelie en ſouriant, que les autres aiment mieux retenir celles que vous leur direz ? peut eſtre, reprit Plotine, les trouueront-ils ſi bonnes, qu’ils n’auront pas la hardieſſe de dire les leurs. Comme vous eſtes icy la ſeule, repliqua Ceſonie, qui pouuez raiſonnablement pretendre à la qualité d’enioüée, il pourra eſtre que les autres ne demeureront pas ſans protection. Ie vous aſſure, reprit Amilcar, qu’il ne leur ſera pas aiſé d’en trouuer : car enfin pour commencer d’entrer en matiere ; n’eſt-il pas vray que l’Amour naiſt parmy la ioye, qu’il ne vit que dans les plaiſirs, & que ſa fin n’eſt regardée que comme la plus grande felicité du monde ? En effet les plus grands ſoupireurs de la Terre, ne ſoupirent que pour auoir de la ioye : & toutes les douleurs & tous les deſeſpoirs d’vn Amant, ont touſiours pour but l’eſperance d’eſtre heureux.