Page:Madeleine de Scudéry - Clélie, histoire romaine - Volume 02.pdf/514

ſez, & plus difficile à connoiſtre : car i’ay aimé des Perſonnes enioüées & brillantes ; i’en ay aimé de melancoliques, de fieres, d’inégales, de capricieuſes, de petites, de grandes, de brunes, & de blondes : & ce qui eſt le plus ſurprenant, c’eſt que i’ay eu deux ou trois grandes paſſions, & que cela n’a pas empeſché que ie n’en aye eu auſſi de mediocres, & de petites : & que ie n’aye meſme eſté capable de faire ſemblant d’en auoir, quoy que ie n’en euſſe pas. Cela eſtant, dit le Prince Sextus, vous pouuez donc nous dire bien preciſément, s’il eſt plus doux d’aimer vne Perſonne enioüée, qu’vne melancolique ou vne capricieuſe. Il eſt vray, reprit Aronce, qu’il apartient plus à Amilcar d’en parler qu’à vn autre : il eſt pourtant luy meſme ſi enioüé, & d’vne humeur ſi eſgalle, dit alors Artemidore, que ie doute ſi le Party