Page:Madeleine de Scudéry - Clélie, histoire romaine - Volume 02.pdf/504

luy parloit d’acheuer ſon Mariage, bien qu’elle fuſt dans les Fers ; bien que Clelius ne pûſt venir à Rome ; & bien qu’il n’oſaſt dire qui il eſtoit ; ny ſonger ſeulement à la mener à Cluſium. Auſſi connut-il luy meſme, que ſa raiſon n’eſtoit pas libre : de ſorte qu’il fut aiſé à la prudente Clelie de donner des bornes à ces deſirs tumultueux qui luy faiſoient ſouhaiter des choſes iniuſtes & impoſſibles. Apres quoy il luy rendit conte en peu de mots, de ce qui luy eſtoit arriué : & Clelie à ſon tour luy aprit ce qu’il n’auoit iamais ſçeu : car elle luy dit comment Horace eſtoit allé au lieu où ce tremblement de Terre l’auoit miſe en ſa puiſſance pour s’eſclaircir du ſuiet de leur voyage, dont on parloit diuerſement à Capouë. Elle luy deſpeignit quel auoit eſté ſon eſtonnement, lors qu’elle s’eſtoit veuë ſans aucun ſe-