Page:Madeleine de Scudéry - Clélie, histoire romaine - Volume 02.pdf/503

raiſon aueque voſtre venu. Eh de grace Madame, luy dit-il, loüez moy vn peu moins, & dittes moy vn peu plus clairement que vous m’aimez de la maniere dont ie veux eſtre aimé : & ſans parler de ma vertu, dittes moy ſeulement que la tendreſſe & la conſtance de mon amour vous touchent ; que celle de mon Riual n’a fait nulle impreſſion dans voſtre cœur ; & que vous auez quelque ioye de regner touſiours dans le mien. En vous diſant que ie ſuis à Rome ce que i’eſtois à Capouë, repliqua modeſtement Clelie, c’eſt vous dire tout ce que vous pouuez ſouhaiter : car puis que i’auois conſenty obligeamment pour vous, au commandement que mon Pere m’auoit fait, ie n’ay plus rien à vous dire. Apres cela Aronce dit à Clelie les choſes du monde les plus tendres : & dans le tranſport de ſa paſſion, il