Page:Madeleine de Scudéry - Clélie, histoire romaine - Volume 02.pdf/502

de Fils de Roy, ſi vous me vouliez oſter celle de voſtre Eſclaue. Ne me traitez donc point auec vne Ceremonie outrageante : figurez vous que vous eſtes ſur le Throſne, & que ie ſuis dans les Fers, & ne me dittes plus rien qui m’offence : car i’ay des ſentimens ſi reſpectueux & ſi tendres pour vous, que ſi vous m’auiez encore vne fois apellé comme vous venez de m’apeller, ie penſe que ie perdrois toute la ioye que i’ay de vous reuoir. Puis que vous le voulez donc mon cher Aronce, luy dit-elle, ie viuray aueque vous comme i’y viuois à Capouë : auſſi bien vous puis-ie aſſurer que vous ne m’auez pas eſté plus conſiderable depuis que i’ay ſçeu que vous etiez Fils de Roy, que vous me l’eſtiez auparauant : car enfin la Fortune en vous donnant vne Couronne, ne vous a rien donné que ie puiſſe mettre en compa-