Page:Madeleine de Scudéry - Clélie, histoire romaine - Volume 02.pdf/50

tables. Comme i’entray alors dans ſa Chambre, elle me dit ce qui luy venoit d’arriuer, & la reſolution qu’elle auoit priſe d’ouurir cette Lettre. Mais, me diſoit-elle, il la faut ouurir auec beaucoup d’Art : car ie ne veux pas que les deux Perſonnes qui y ont intereſt ſçachent que ie l’auray veuë. Au contraire en la rendant ſans qu’on puiſſe ſoubçonner que ie l’aye ouuerte, i’agiray apres en ſorte que celle qui l’a eſcrite, penſera que ſon nouuel Amant m’aura reuelé ſon ſecret : & pour celuy à qui elle s’adreſſe, ie taſcheray de luy faire croire que ie ſçay ce qu’on luy a eſcrit par quelqu’vn des autres Amans de cette Dame : c’eſt pourquoy il faut que i’aporte vn ſoin tout extraordinaire à ouurir cette Lettre ſans qu’on s’en aperçoiue. Et en effet, Statilie apres auoir raiſonné deux heures ſur cette auanture, & en auoir employé