Page:Madeleine de Scudéry - Clélie, histoire romaine - Volume 02.pdf/499

que cette entre-ueuë malgré le pitoyable eſtat où ils eſtoient, eut quelque choſe de fort doux. Cependant afin qu’ils euſſent la liberté de s’entretenir, Amilcar qui auoit deſia veû ces Dames le iour auparauant, commença de leur parler, comme s’il les euſt veuës toute ſa vie : car comme il ſe trouua entre l’enioüée Plotine, & l’aimable Ceſonie, qui ſuportoient leur infortune auec plus de conſtance que les autres, il luy fut aiſé de tourner la conuerſation d’vne maniere agreable. Pour Artemidore, il ne s’oſoit pas trop hazarder de parler, parce qu’il n’eſtoit pas Romain : & pour Zenocrate, quoy qu’il parlaſt tres agreablement quand il le vouloit, il ne parloit iamais guere aux premieres viſites qu’il faiſoit : mais il eſcoutoit pourtant d’vne façon qui ne laiſſoit pas de faire voir à ceux qui ſe connoiſſoient en Gens d’eſprit, qu’il