Page:Madeleine de Scudéry - Clélie, histoire romaine - Volume 02.pdf/494

comme deux Amis qu’il auoit connus pendant ſes voyages, & comme deux hommes qui venoient luy offrir de le ſeruir durant le Siege d’Ardée : adiouſtant en ſuite vne tres humble priere de vouloir deliurer Clelie, à qui il donna vn autre nom : repreſentant à Tarquin qu’elle n’eſtoit point d’Ardée ; qu’elle y auoit eſté menée par vn Amant qu’elle auoit qui l’auoit enleuée ; & qu’ainſi eſtant née à Nole en Campagnie, & eſtant Sœur d’vn homme qui vouloit mourir pour ſon ſeruice, elle meritoit d’eſtre traittée d’vne autre maniere que ces autres Captiues, qui eſtoient Filles, Femmes, ou Sœurs de ſes Ennemis. D’abord Tarquin reçeut admirablement bien ; & Aronce, & Celere : & il ne reietta pas meſme la priere que luy faiſoit Amilcar pour la pretenduë Sœur de ce dernier : mais comme il eſtoit vray que Clelie