Page:Madeleine de Scudéry - Clélie, histoire romaine - Volume 02.pdf/493

& la ioye dans ſon cœur, il obligea Aronce à ſe deſcouurir à Artemidore, & Artemidore à ſe deſcouurir à Aronce : qui ne ſçeut pas pluſtoſt ſa veritable condition, qu’il connut qu’il eſtoit Frere de la Princeſſe des Leontins, à qui il auoit tant d’obligation. Si bien que l’embraſſant alors auec tendreſſe, il l’aſſura de ſon amitié, & luy demanda la ſienne : ſans luy parler pourtant de la Princeſſe ſa Sœur, iuſques à ce qu’il euſt ſçeu dans quels ſentimens il eſtoit alors : & ſi ce qu’il penſoit de l’agreable Zenocrate eſtoit vray. Cependant comme il eſtoit extraordinairement tard, & qu’ils auoient preſques paſſé la nuit d’auparauant ſans dormir, ils donnerent le reſte de celle-là au repos : mais lors que le matin fut venu, ſuiuant ce qui auoit eſté reſolu le ſoir, Amilcar fut au leuer de Tarquin, pour luy preſenter Aronce & Celere,