Page:Madeleine de Scudéry - Clélie, histoire romaine - Volume 02.pdf/492

Amilcar auoit fait ce qu’il vouloit faire, dés qu’il eut remené Sextus à ſon Apartement, il s’en retourna trouuer Aronce. Il remarqua pourtant deuant que de quiter ce Prince, que Clelie touchoit ſon cœur : & il luy fit meſme dire qu’il la trouuoit admirablement belle : & que le ſeul deffaut qu’il voyoit, eſtoit qu’il croyoit qu’elle eſtoit trop ſage. Cependant comme l’amitié vniſſoit trop Aronce, Amilcar, & Celere, pour eſtre en Logis different, ils ſe ioignirent dés le meſme ſoir : & Artemindore & Zenocrate auſſi, ſans qu’Aronce fuſt traité comme Fils de Roy, ny Artemidore comme Prince, parce que l’eſtat de leur fortune le vouloit ainſi. Mais comme Amilcar les connoiſſoit tous deux, il voulut qu’ils ſe connuſſent : ſi bien qu’apres auoir dit à Aronce tout ce qu’il auoit fait, & auoir remis l’eſperance