Page:Madeleine de Scudéry - Clélie, histoire romaine - Volume 02.pdf/485

affligez à Ardée, & qu’il y en aura bien toſt de mal-traitez à Rome. Les Romains ont la reputation d’eſtre ſi glorieux (repliqua cette Perſonne qui ſuportoit ſa priſon ſi guayement, & qui ſe nommoit Plotine) qu’il n’eſt pas croyable qu’il y en ait vn ſeul qui veüille eſtre Eſclaue d’vne Eſclaue. Ha Seigneur (s’eſcria alors Amilcar auec cette agreable liberté d’eſprit qui luy eſt naturelle) voila le plus bel endroit du monde pour vn Romain qui voudroit faire vne galante declaration d’amour : & ſi ie l’eſtois, ie ne la laiſſerois pas eſchaper : car il eſt certain qu’il n’y a rien de ſi difficile à faire à propos, & à faire galamment : du moins ſçay-ie bien que depuis que ie ſuis Amant, ie penſe en auoir fait cent, ſans en auoir iamais pû faire que deux dont i’aye eſté tout à fait content. Il eſt vray (dit Sextus en riant auſſi