Page:Madeleine de Scudéry - Clélie, histoire romaine - Volume 02.pdf/479

faut taſcher de faire ſçauoir à Clelie qu’il faut qu’elle die qu’elle eſt de Nole, & que Celere eſt ſon Frere. Et puis quand nous ſerons aſſurez d’elle, ie preſenteray Celere à Tarquin, qui viendra luy demander la liberté de ſa Sœur, pour laquelle nous ſoliciterons : car par ce moyen, elle ne ſera point connuë pour eſtre Fille de Clelius : mais le principal eſt de parler à Clelie. Ie ne croy pas, reprit Artemidore, qu’il ſoit fort aiſé de trouuer moyen de la bien inſtruire de ce que vous voulez qu’elle ſçache : il n’eſt peut-eſtre pas ſi difficile que vous le penſez, reprit Amilcar, & ſi ie retourne ce ſoir au Palais, i’en trouueray bien l’inuention. De ſorte qu’Aronce entendant parler Amilcar de cette façon, le coniura inſtamment de vouloir tout eſſayer pour luy rendre office : & en effet Amilcar s’eſtant chargé de la choſe,