Page:Madeleine de Scudéry - Clélie, histoire romaine - Volume 02.pdf/477

comme i’ay vne curioſité vniuerſelle pour toutes choſes, & qu’il y a quelque plaiſir à voir les diuerſes follies des hommes, comme les diuerſes ſageſſes, ie me ſuis mis tantoſt à luy parler durant vn quart d’heure : mais comme on me l’auoit repreſenté ſi effroyablement ſtupide, ie luy ay fait cent queſtions bizarres que i’ay veû qui luy deſplaiſoient : & où il ne m’a point voulu reſpondre preciſément. On dit qu’il parle ſi peu, reprit Artemidore, qu’il ne faut pas prendre pour vn effet de ſa raiſon, ce qui en eſt vn de ſa ſtupidité : car enfin on a bien entendu parler de Gens qui cachent leurs Threſors, mais on n’en a iamais veû, qui ayent voulu cacher tout leur eſprit. Quoy qu’il en ſoit, dit Amilcar, il en a plus qu’on ne penſe. Ie ne ſçay ſi cela eſt vray, reprit Zenocrate, mais ie ſçay bien que vous en auez encore plus