Page:Madeleine de Scudéry - Clélie, histoire romaine - Volume 02.pdf/476

durant qu’Amilcar les entretenoit, s’eſt mis à l’eſcouter attentiuement : & comme vous ſçauez qu’il dit les choſes d’vn air tout à fait agreable, Brutus a ſoury deux fois ſi à propos, que ceux qui l’ont remarqué en ont fait vn fort grand bruit, & ont regardé cela comme vn miracle de l’eſprit d’Amilcar. En effet i’ay entendu vn Cheualier qui diſoit derriere moy, en parlant bas à vn autre, que Brutus eſtoit bien heureux d’auoir donné cette marque d’intelligence en lieu où Tarquin n’eſtoit pas : vous auez raiſon, luy a dit celuy à qui il parloit, car ie ſuis aſſeuré que s’il l’auoit veû ſourire auſſi à propos qu’il a fait, qu’il le feroit mourir auſſi bien que ſon Frere : car ce n’eſt que parce qu’il croit qu’il n’a nul eſprit qu’il eſt viuant. Ie vous reſpons, dit alors Amilcar, que Brutus n’eſt pas ſi priué de ſens qu’on le croit : car