Page:Madeleine de Scudéry - Clélie, histoire romaine - Volume 02.pdf/473

ſe mettre au deſſus de ſon ſexe, en ne s’aſſuietiſſant pas à toutes ces petites choſes de la bien-ſeance ordinaire des Dames qui n’ont qu’vn mediocre eſprit, & qui n’ont pas le cœur Grand comme elle. Pour le Prince Sextus, comme ie me ſuis ſouuenu de ſon inclination pour les Femmes, ie ne luy ay parlé que de la galanterie de nos Affriquaines, & de l’agréement des Beautez Greques. Mais comme ie ſçay qu’il n’eſt pas trop reglé en ſes amours, ie luy ay fait vne grande ſatire de ces Amans reguliers qui ſoupirent vn an deuant que de dire qu’ils aiment : & qui ſont ſi conſtans qu’ils vieilliſſent au ſeruice d’vne ſeule Maiſtreſſe. De ſorte que croyant que tous ſes ſentimens eſtoient les miens, il m’a dit tout ce qu’vn voluptueux qui ne croit pas trop aux Dieux, & qui ne craint guere les hommes, peut dire au plus