Page:Madeleine de Scudéry - Clélie, histoire romaine - Volume 02.pdf/472

comme il a voulu eſtre inſtruit de l’eſtat où eſt preſentement Carthage, ſçachant bien qu’il y a quelques intereſts à démeſler entre la Sicile & cette Republique, i’ay rapellé dans ma mémoire toute la Politique de ceux qui ont regné le plus abſolument, & tout ce que i’ay apris ſur ce ſuiet dans mes voyages, ou dans les Liures. I’ay loüé hautement Periandre, Roy de Corinthe, qui ſçeut ſi bien ſe faire obeïr par force : i’ay mis Semiramis au deſſus de Cyrus, parce qu’elle eſtoit plus fiere, que cét illuſtre Conquerant : & meſtant quelque demie profanation auec ma Politique, en vne heure i’ay eſté tout à fait bien auec Tarquin. Pour Tullie, quand ie luy ay parlé ſans teſmoins, ie luy ay fait entendre que toute la Terre diſoit que Tarquin luy deuoit la Couronne : & qu’elle meritoit mille loüanges d’auoir ſçeu