Page:Madeleine de Scudéry - Clélie, histoire romaine - Volume 02.pdf/471

Saturne, d’Hercule, de Diane, & de pluſieurs autres Diuinitez ? Pour moy, interrompit Celere, ie ne m’eſtonne pas encore tant que vous ayez pû faire voir toutes ces choſes en ſi peu de temps, comme ie m’eſtonne de voir comment vous auez pû d’abord aquerir la familiarité de Tarquin, de Tullie, & des Princes leurs Enfans : car ils ſont preſques tous d’humeur differente. Ce qui a fait la choſe, reprit Amilcar, c’eſt que ie me ſuis ſouuenu en arriuant à Rome de la maniere qu’Herminius les auoit dépeints : de ſorte qu’eſtant allé hardiment trouuer Tarquin au nom du Prince de Carthage, & luy ayant en ſuite preſenté Artemidore & Zenocrate, comme deux de mes Amis, ſans les faire connoiſtre pour ce qu’ils ſont : i’ay eſté aſſez heureux pour faire que dés cette premiere conuerſation i’aye aquis quelque credit aupres de luy : car