Page:Madeleine de Scudéry - Clélie, histoire romaine - Volume 02.pdf/467

ſion, reprit Amilcar, ie veux me mettre bien auec Tullie : il ne vous ſera pas trop difficile, interrompit Zenocrate, car vous eſtes deſia en ſi grande familiarité auec elle, que ie croy que ſi vous le vouliez, vous ſeriez bien toſt le Confident de tous ſes crimes. Pour moy (adiouſta Artemidore, en parlant à Aronce) ie ne ſçay comment il eſt poſſible qu’Amilcar en auſſi peu de temps qu’il y a que nous ſommes icy, ait pû faire tant de choſes : car il nous a montré toute la Ville ; il eſt fort bien auec Tarquin & auec Tullie ; il eſt encore mieux auec le Prince Sextus ; & le Prince de Pometie & Titus le cherchent aueque ſoin. Il ſçait les noms de toutes les Belles de Rome : & le plus ancien des Saliens, croit qu’il a eſté Salien luy meſme, tant il luy a parû bien inſtruit de toutes leurs Ceremonies : & ſi vous luy auiez entendu en-