Page:Madeleine de Scudéry - Clélie, histoire romaine - Volume 02.pdf/466

croy point du tout : car ie ſuis le plus trompé de tous les hommes, s’il ne la trouue fort belle, & ſi Tullie ne l’a remarqué auſſi bien que moy. En effet ie viens de la laiſſer qui dit à Tarquin qu’il a tort d’auoir ſi mal traité des Veſtales : & qu’au contraire puis qu’il ne s’agit que de deliurer des Femmes, il deuroit les leur accorder. De ſorte que comme ie ſçay que Tullie n’eſt pas fort ſcrupuleuſe en matiere de Religion, & que i’ay remarqué qu’elle voyoit auſſi bien que moy que Tarquin trouuoit que Clelie eſtoit la plus belle de toutes les Captiue, ie conclus qu’elle la deliurera bien toſt. Tullie a ſi peu accouſtumé de ſe ſeruir de remedes innocens, reprit Aronce, que ie crains bien qu’elle ne ſonge pluſtoſt à perdre Clelie qu’à la mettre en liberté, ſi elle en deuient ialouſe. Pour vous guerir de cette aprehen-