Page:Madeleine de Scudéry - Clélie, histoire romaine - Volume 02.pdf/458

vous traite en Sœur de mon plus ancien & plus mortel ennemy. Comme Veſtale, reprit hardiment Verenie, ie merite que vous me reſpectiez : & comme Sœur de Clelius, ie merite que tout le Peuple de Rome s’arme pour ma deffence : puis qu’il n’a pas tenu à mon Frere, qu’il ne fuſt pas opprimé par voſtre iniuſte puiſſance. Quoy que les Loix, repliqua bruſquement Tarquin, ne condamnent les Veſtales à eſtre enterrées toutes viues, que pour vne eſpece de crime ſeulement, ie pourrois bien vous faire eſprouuer ce ſuplice là, pour vn crime d’autre nature, ſi vous portiez voſtre inſolence plus loin : allez donc encore vne fois, garder le feu ſacré dont vous eſtes Depoſitaire : & croyez bien fortement que ſi Clelius ou quelqu’vn qui luy apartienne tombe iamais ſous ma puiſſance, & que ie l’en-