Page:Madeleine de Scudéry - Clélie, histoire romaine - Volume 02.pdf/455

n’ay point ſçeu que ie deuſſe trouuer ces Dames : & la choſe s’eſt faite de façon que vous pouuez meſme connoiſtre aiſément que ie ne le pouuois pas ſçauoir. Ie ſçay bien que vous me pouuez dire que ces Dames ſont des Priſonnieres de Guerre, & non pas des Criminelles : mais ſi elles ſont innocentes, elles ſont plus dignes de grace : ioint que ſelon toutes les Loix, qui peut faire le plus, peut faire le moins : ainſi ie conlus que puis que nous pouuons ſauuer la vie à vn Criminel, nous pouuons donner la liberté à des innocentes. Ie ſçay bien encore que le hazard n’a iamais fait que les Veſtales ayent rencontré des Priſonniers de Guerre, comme il a fait diuerſes fois qu’elles ont rencontré des Criminels : mais cela n’empeſche pas que la Loy ne doiue eſtre expliquée comme ie le dis : & la conioncture eſt ſi fauorable pour nous,