Page:Madeleine de Scudéry - Clélie, histoire romaine - Volume 02.pdf/449

chant auec Celere, pour aduiſer s’il eſtoit à propos de faire ſçauoir à cette Veſtale que Clelie eſtoit ſa Niece, deuant que de parler à Tarquin. Si bien que s’imaginant qu’elle agiroit auec plus de force, ſi elle le ſçauoit, que ſi elle ne le ſçauoit pas, ils ſe reſolurent de luy confier vn ſi important ſecret. Pour cét effet lors qu’elle fut deſcenduë de la Chaire où on la portoit, & qu’elle fut prés d’vn grand & ſuperbe Portique qui eſtoit au milieu de la Face du Palais de Tarquin, Aronce s’aprochant tres reſpectueuſement d’elle (apres luy en auoir fait demander la permiſſion par vn de ceux qui l’accompagnoient) luy dit tout bas en peu de paroles qu’elle voyoit parmy ces Captiues vne Perſonne qu’il luy monſtra, qui eſtoit Fille de ſon Frere : & qu’il la coniuroit au nom de Clelius de la proteger hautement, & de ne la deſcouurir pas. Comme Ve-