Page:Madeleine de Scudéry - Clélie, histoire romaine - Volume 02.pdf/446

ges ſont tels que vous les dittes, & qu’ils s’eſtendent ſur des Captiues, comme ſur des Criminels : mais, comme vous le ſçauez, ce n’eſt pas à moy à decider vne choſe de cette importance : & tout ce que ie puis eſt de vous ſuplier de venir vous meſme ſoutenir voſtre droit deuant le Roy, & de vous offrir de vous y conduire auſſi bien que ces Dames : car ie vous aſſure que ſi ie pouuois les remettre entre vos mains ſans expoſer ma vie, ie le ferois aueque ioye. Verenie trouuant que cét Officier n’auoit pas tort, & ayant conſulté vn moment auec ſa Compagne, quoy qu’elle puſt elle ſeule reſoudre la choſe, parce qu’elle eſtoit la premiere de toutes les Veſtales, elle prit le chemin du Palais, dont elle n’eſtoit pas loin. Mais comme cette conteſtation auoit duré quelque temps, il s’eſtoit aſſemblé aſſez de monde à l’entour