Page:Madeleine de Scudéry - Clélie, histoire romaine - Volume 02.pdf/442

pas arreſtez. Mais comme ils n’auoient plus de Guide, ils prirent vn chemin fort long : & ils furent contraints de faire repaiſtre leurs Cheuaux, & de ſe repoſer deux ou trois heures. Si bien qu’ils n’arriuerent à vne Porte de Rome, qu’on apelloit alors la Carmentale, que vers le ſoir. Cette Porte n’eſtoit pourtant pas celle par où l’on alloit à Ardée, car elle eſtoit au pied du Capitole qui luy eſtoit oppoſé : mais comme Aronce & Celere s’eſtoient eſgarez, ils entrerent par celle-là, & furent loger où ils auoient logé autrefois lors qu’ils auoient eſté à Rome par curioſité ſeulement. Mais à peine furent-ils deſcendus de cheual, qu’ils furent taſcher de ſçauoir des nouuelles de Clelie, & de retrouuer Artemidore, Amilcar, & Zenocrate, qu’ils iugeoient bien deuoir eſtre à Rome, parce que Tarquin