Page:Madeleine de Scudéry - Clélie, histoire romaine - Volume 02.pdf/441

que Clelie pûſt eſtre en nul lieu de la Terre, ſans y eſtre veuë de tout le monde. De ſorte que le malheureux Aronce alloit à Rome auec tant d’inquietude, que Celere n’eſtoit pas peu occupé à le conſoler. Ce qui les obligeoit d’aller pluſtoſt à Rome qu’au Camp, eſtoit qu’ils auoient entendu qu’Helius auoit commandé à ceux qui conduiſoient les Dames auec qui Clelie eſtoit, de prendre le chemin de cette fameuſe Ville. Mais afin de n’y eſtre pas ſans connoiſſance, Herminius en ſe ſeparant d’Aronce, luy auoit dit des choſes ſi particulieres pour dire à la vertueuſe Siuelia ſa Mere, qu’il ne doute point qu’elle ne luy rendiſt office. Comme il n’y auoit que dix-huit Mille d’Ardée à Rome, & que le lieu d’où ils eſtoient partis en eſtoit encore plus prés qu’Ardée, ils y fuſſent arriuez deux heures apres le leuer du Soleil, s’ils ne ſe fuſſent pas eſgarez, & s’ils ne ſe fuſſent