Page:Madeleine de Scudéry - Clélie, histoire romaine - Volume 02.pdf/439

durant le ſiege d’Ardée, afin de l’obliger à deliurer Clelie : de ſorte que l’auerſion qu’il auoit conçeuë pour ce Prince, depuis qu’il auoit voulu faire aſſaſſiner Clelius à Capouë, & depuis qu’Herminius luy en auoit raconté la vie, faiſoit qu’il n’executoit ce deſſein qu’auec vne repugnance qu’il n’euſt pû vaincre, ſi l’intereſt de ſon amour ne l’euſt ſurmontée. D’autre part, quand il penſoit que Clelie eſtoit peut-eſtre traitée en Eſclaue, & que ſi elle eſtoit reconnuë pour Fille de Clelius, ſa vie ſeroit en grand danger, il n’eſtoit pas Maiſtre de ſa raiſon, & il abandonnoit ſon ame à la douleur. Il n’oſoit meſme eſperer pour ſe conſoler que Clelie luy euſt conſerué ſon affection toute entiere : ou s’il l’eſperoit, il l’eſperoit ſi foiblement, qu’il n’en eſtoit guere moins malheureux. Il craignoit auſſi d’eſtre obligé de ſe faire connoi-