Page:Madeleine de Scudéry - Clélie, histoire romaine - Volume 02.pdf/438

dire que l’obiet de toute ſon amitié, & de toute ſon amour y eſtoit, car il auoit vne paſſion violente en ce lieu là : il y auoit vne illuſtre Mere qu’il aimoit cherement : & il y auoit vne Amie en la perſonne de Clelie qui luy eſtoit infiniment chere. Mais apres tout, la haine qu’il auoit pour Tarquin eſtoit ſi forte, & ſi bien fondée, qu’il ſurmontoit par elle ſeule, toute la tendreſſe de ſon ame. Pour Horace, la vertu de ſon Riual faiſoit vn de ſes plus grands ſuplices : la perte de Clelie le faiſoit pourtant encore ſouffrir dauantage : & quoy qu’il haïſt horriblement Tarquin, la ialouſie faiſoit qu’il aimoit encore mieux qu’elle fuſt Eſclaue de ce Tyran, que d’eſtre deliurée par ſon Riual. D’ailleurs Aronce en s’aprochant de Rome, auoit des ſentimens bien meſlez : car il ne pouuoit y aller qu’auec l’intention de ſeruir Tarquin