ſenſible qu’Aronce à la compaſſion, il ne s’y oppoſa point : & Celere n’oſa contredire deux Perſonnes dont tous les ſentimens luy paroiſſoient touſiours fort raiſonnables : ainſi ils furent tous trois vers l’endroit d’où de temps en temps ils entendoient quelque douloureuſe exclamation. Mais à la fin, lors qu’ils furent aſſez proche pour pouuoir entendre ce que diſoit la Perſonne qui ſe pleignoit, Aronce connut que c’eſtoit la voix d’Horace. De ſorte que retenant ſon Cheual, & diſant la penſée qu’il auoit à ſes Amis, ils ſe mirent à eſcouter, & entendirent que c’eſtoit effectiuement Horace qui ſe pleignoit. Helas (diſoit-il à vn de ſes Amis qui eſtoit aueque luy) en quel pitoyable eſtat ſuis-ie reduit ? i’ay eſté bleſſé par Aronce, ſans qu’il ſçache luy meſme qu’il s’eſt vangé de mon ingratitude : car ie l’ay connu à la
Page:Madeleine de Scudéry - Clélie, histoire romaine - Volume 02.pdf/428
Cette page n’a pas encore été corrigée
