Page:Madeleine de Scudéry - Clélie, histoire romaine - Volume 02.pdf/424

dans les chariots dont elles eſtoient deſcenduës, & qu’on les fiſt marcher vers Rome. Aronce entendant cela, n’eſtant pas en eſtat de le pouuoir empeſcher, & ne pouuant plus diſcerner ſon Riual, fit deſſein de ſe deſgager pour la ſuiure : & d’aller pluſtoſt ſe faire connoiſtre à Tarquin pour la proteger, que de la laiſſer Eſclaue. Ce deſſein auoit pourtant beaucoup de conſequences fâcheuſes, mais il n’eſtoit pas en lieu pour les pouuoir examiner : ſi bien que faiſant ſeulement ce que l’amour vouloit qu’il fiſt, il ſe deſgagea : & fut ſi heureux qu’ayant choqué en paſſant Herminius & Celere, il les connut à la voix. De ſorte que ſe ioignant à eux, ils ſe retirerent en combatant, iuſques à ce qu’ils euſſent gagné vn petit Bois, qui les mit à couuert. Mais à peine eurent-ils fait cent pas, que la Bride du Cheual d’A-