Page:Madeleine de Scudéry - Clélie, histoire romaine - Volume 02.pdf/422

pour Hellius, en combatant contre Horace : & Hellius combatoit auſſi pour Horace, en combatant contre Aronce : & la confuſion deuint d’autant plus grande, que la nuit vint tout d’vn coup, & fit que ny les vns ny les autres ne ſe reconnoiſſoient plus : ſi bien qu’il y eut alors le plus effroyable deſordre que l’on ſe puiſſe imaginer. Car les intereſts de ceux qui combatoient eſtoient ſi differens, qu’il ſembloit qu’ils ne pouuoient meſme agir chacun ſelon le leur. En effet Aronce euſt voulu, s’il euſt pû, deliurer Clelie, & des mains d’Hellius, & de celles d’Horace : parce qu’il luy eſtoit encore plus dangereux d’eſtre ſous la puiſſance de Tarquin, ſi elle eſtoit reconnuë, que d’eſtre ſous celle de cét Amant. De plus, il euſt auſſi voulu deffendre Herminius, & tuer Horace. Pour Herminius, il euſt voulu pouuoir remettre Clelie entre