Page:Madeleine de Scudéry - Clélie, histoire romaine - Volume 02.pdf/421

qu’ainſi il ne fuſt perdu, ſe ietta bruſquement ſur Aronce : qui parant le coup qu’il luy porta ſans auoir loiſir de reſpondre à ce qu’Hellius luy auoit dit, luy en deſchargea vn autre ſi peſant qu’il en fut eſtourdi. Mais pendant que ces deux fiers Riuaux combatoient, Hellius commanda qu’on s’aſſuraſt de Clelie, & qu’on la gardaſt auec les autres Dames, ce qui fut fort aiſé à faire : car Herminius & Celere voyant quelques-uns des Gens d’Horace qui s’auançoient auſſi vers Aronce, ils furent vers luy l’Eſpée à la main : ſi bien qu’Hellius voulant alors faire enuelopper & Herminius, & Horace, il ſe fit vn Combat ſi meſlé qu’on ne ſçauoit qui eſtoit Amy ou Ennemy : car les Gens d’Horace combatoient quelquefois pour Aronce, & pour Herminius, en combatant contre Hellius : Aronce, Herminius, & Celere, combatoient auſſi