Page:Madeleine de Scudéry - Clélie, histoire romaine - Volume 02.pdf/417

aidaſſent à empeſcher qu’on ne luy enleuaſt Clelie il ſe trouua que ſans qu’il y euſt rien de concerté entre les vns & les autres, ils changerent le deſſein de ſe combatre, en celuy d’aller attaquer les Protecteurs de l’admirable Clelie, qui ſe vit alors au plus pitoyable eſtat du monde : car quand elle vint à ſe tourner elle vit que les Gens de Tarquin, & ceux d’Horace, venoient fondre auec vne eſgalle impetuoſité contre Aronce, Herminius, & Celere, qui auoient deſia tourné teſte vers ceux qui les pourſuiuoient : quoy qu’ils ne puſſent pretendre autre gloire que de vendre leur vie bien cherement, & que de mourir auec honneur. De ſorte que l’admirable Clelie voyant trois hommes qui luy eſtoient ſi chers, en eſtat d’eſtre attaquez par trente, & ſe les figurant deſia morts,