Page:Madeleine de Scudéry - Clélie, histoire romaine - Volume 02.pdf/416

qu’il ſe preparoit à ſuiure Clelie, Aronce & Herminius ayant tourné la teſte, pour voir s’ils n’eſtoient point ſuiuis, il arriua la plus eſtrange choſe du monde. Car Horace ayant reconnu ſon Riual, pouſſa ſon cheual pour luy enleuer Clelie vne ſeconde fois : mais en le pouſſant, il cria à ceux qui eſtoient de ſon Party, qu’ils le ſuiuiſſent. Cependant en meſme temps vn homme apellé Hellius, qui eſtoit Chef de ceux qui combatoient contre Horace, & qui eſtoit fort bien auec Tarquin, ayant reconnu Herminius, & ſçachant combien la vertu de cet excellent homme le rendoit redoutable au Tyran, creût que ſa fortune ſeroit faite, s’il pouuoit le luy mener viuant ou mort. C’eſt pourquoy commandant aux ſiens de le ſuiure pour aller vers Herminius, dans le meſme temps qu’Horace diſoit à ceux de ſon Party qu’ils luy