Page:Madeleine de Scudéry - Clélie, histoire romaine - Volume 02.pdf/415

cette precipitation, elle dit à ces Dames auec qui elle eſtoit, qu’elle ſouhaitoit que ceux qui combatoient pour elles, vainquiſſent : & qu’elle les prioit de luy pardonner ſi ayant des Ennemis dans tous les deux Partis, elle acceptoit le ſecours que les Dieux luy offroient : apres quoy eſtant montée à cheual, & Aronce auſſi ; vne Fille qui la ſuiuoit, & qui luy auoit eſté donnée par Horace, ſe mit à faire des cris ſi effroyables, que ce vaillant Romain l’ayant entenduë, & ayant tourné la teſte pour voir ſi l’on ne luy faiſoit point quelque outrage ; il vit Clelie à cheual qui marchait la premiere, conduite par vn Eſclaue, & ſuiuie de trois hommes à cheual auſſi bien qu’elle, qui luy ſemblerent auoir l’air de Gens de qualité, quoy qu’il ne leur viſt pas bien le viſage : & d’vn autre qui ſembloit n’eſtre qu’vn Domeſtique. Mais comme il regardoit cela, &