Page:Madeleine de Scudéry - Clélie, histoire romaine - Volume 02.pdf/413

ils eſperoient de pouuoir aprocher d’Ardée par vn chemin deſtourné où les Troupes de Tarquin n’eſtoient pas encore poſtées : ils ſortirent de ce Bois : & deſcendant dans vn petit valon tout plein d’Aliſiers, qui croiſſoient au bord d’vn petit Ruiſſeau qui ſerpentoit vne fort agreable Prairie, ils entreuirent de loin des Gens armez qui combatoient : & ils entendirent des voix de Femmes, meſlées au bruit des Cheuaux & des Armes. Aronce creût meſme auoir entendu la voix de Clelie : ſi bien que pouſſant à toute bride vers le lieu d’où venoit cette voix, il vit deux Chariots, & il vit Clelie au pied d’vn Arbre auec quatre ou cinq autres Dames bien faites qui ſe pleignoient d’vne façon fort touchante : pendant que dix hommes à la teſte deſquels eſtoit Horace, combatoient contre vingt. En cét inſtant Aronce