Page:Madeleine de Scudéry - Clélie, histoire romaine - Volume 02.pdf/407

m’expoſeroit pas à la cruauté de ſon Pere, & qu’il me deliureroit : mais pour Tarquin, i’aduouë que ie ne balançerois point ſi l’on me donnoit le choix de prendre du Poiſon, ou de tomber ſous ſa puiſſance. Apres cela Aronce preſſé par ſon amour, vouloit preſques s’en aller à Ardée, ſans attendre l’Eſclaue qu’il y auoit enuoyé : mais Amilcar, Herminius, & Celere, luy firent ſi bien voir que meſme l’intereſt de Clelie vouloit qu’il attendiſt ſon retour, qu’il ſe reſolut d’attendre iuſques au lendemain au ſoir. Mais apres cela, leur dit-il, ie n’attendray plus : car enfin il ne ſeroit pas impoſſible, que cet Eſclaue euſt eſté pris en allant ou en reuenant, par les Troupes de Tarquin : & qu’ainſi il ne reuinſt pas me trouuer. Comme ce que diſoit Aronce eſtoit raiſonnable, ſes Amis ne le contredirent point : & ils donnerent