Page:Madeleine de Scudéry - Clélie, histoire romaine - Volume 02.pdf/405

pes qui paſſoient, & qui alloient ſe poſter aupres d’Ardée, du coſté qui regardoit la Mer, qui n’en eſtoit qu’à vn Mille. Ils ſçeurent meſme que Tarquin deuoit partir de Rome le lendemain pour aller au Camp : cependant comme Herminius ne vouloit pas eſtre reconnu, par ceux qui conduiſoient les Troupes de ce Prince, il ne les regarda pas : & il n’y eut qu’Aronce, Artemidore, Amilcar, & Zenocrate, qui ne pouuant eſtre connus, les virent paſſer. Mais apres que ces Troupes furent paſſées, Aronce fut dans vne impatience eſtrange du retour de Celere, & de celuy de l’Eſclaue qu’il auoit enuoyé à Ardée : parce qu’il craignoit que lors que Tarquin ſeroit arriué au Camp, la Ville ne fuſt ſi preſſée, qu’il ne pûſt s’y ietter en cas qu’il fuſt à propos de le faire pour l’intereſt de Clelie. Il eſt vray que par bonheur pour luy ſon impa-