Page:Madeleine de Scudéry - Clélie, histoire romaine - Volume 02.pdf/404

leurs temperammens, en met beaucoup aux effets d’vne meſme paſſion. Car enfin l’amour dans le cœur de Tarquin, luy fait faire mille crimes : & cette meſme paſſion dans le cœur d’Aronce, luy fait faire mille actions heroïques. Il eſt vray, reprit Artemidore, mais ie ſouſtiens toûiours qu'en quelque cœur que regnent les paſſions, elles donnent de la peine à celuy meſme qui les veut contenter : & ie ſouſtiens touſiours au contraire, reprit Amilcar, que ſans les paſſions nous ne ſerions point heureux : & que nous ne le pourrions eſtre. Cette galante diſpute n’euſt pas encore finy ſi toſt, ſi vn aſſez grand bruit de Gens à cheual ne l’euſt interrompuë : & n’euſt obligé ceux qui s’entretenoient ſi agreablement, à regarder ce que c’eſtoit : il eſt vray qu’ils en furent bien toſt eſclaircis, car ils ſçeurent que c’eſtoient des Trou-