Page:Madeleine de Scudéry - Clélie, histoire romaine - Volume 02.pdf/395

meſme ie dis qu’auec tous les maux des paſſions, ie ſerois bien marry qu’on les oſtaſt à tous les hommes : car ie ſuis perſuadé que qui les oſteroit toutes, oſteroit tous les plaiſirs, comme l’a fort bien dit Herminius. Mais encore voudrois-ie bien ſçauoir (adiouſta-t’il en adreſſant la parole à Zenocrate qui ne ſe meſtoit point dans cette diſpute) de quel aduis vous eſtes ? Si ie l’auois ſçeu moy meſme, reprit-il agreablement en ſouriant, ie l’aurois deſia dit : mais à vous parler ſincerement, ie ne le ſçay pas encore : car comme ie ſuis aſſez ſenſible à l’amour, ie voudrois du moins retenir cette paſſion : mais d’ailleurs comme ie ſuis naturellement tres pareſſeux, il me ſemble que ie ne ſerois pas trop marry qu’il n’y euſt point de paſſions au monde : parce que ie m’imagine que s’il n’y en auoit point on ſeroit continuellement dans vne